Los Tilholèrs

Avetz vos vist los tilholèrs (bis)
Quant son braves, hardits, leugèrs, (b)
Hasent la promenada
Capsús de Pèirahorada
En tirant l’aviron
Tot dret entau patron ?

Ça-vietz, daunetas si vos platz (bis)
Aciu qu’èm d’aunestes gojats. (b)
Non cranhitz pas la galèrna,
Ni lo vent de la sobèrna.
Dab nos qu’am Pojalèr,
Lo brave tilholèr.

Per promenar lo temps qu’ei bèth (bis)
Embarcatz en noste vaishèth ! (b)
La nosta governanta
Qu’ei beròia e charmanta.
Per estar de París,
Que sembla deu país.

En arribant au Pont Major (bis)
Quartièr de Baiona la flor, (b)
Deu haut de la tilhòla
Qu’an hèit la cabriòla
Deu haut de Panecaut
Qu’an hèit lo subersaut.

Puish en reprenent l’aviron (bis)
Que se’n van dret tà Sent Leon (b)
Ensenhar la joenessa
A banhà’s dab hardiessa
Per apréner com cau
A har lo subersaut.